Tum se mujhe ishq ka daawa to naheen hai,
Lekin dil ke mausamon ko jaanta hoon main.
Ehsaas mein ye tugyaani pehle kabhi na thi,
Jazbaat mein ye jawaani pehle kabhi na thi.
Pehle mere qadam kabhi behke huwe na the,
Jaagti aankhon ke khwaab mehke huwe na the.
Koi hai jo mere khwaabon mein samaata ja raha hai,
Meri taareek raahon mein sawere ugaa raha hai.
Namehram se ik hamdam tak, sab parde chatakh rahe hain,
Sadiyon pe phaile faasle aise simat rahe hain.
Ke mehfil mein rahoon to mehfil ka lehaaz naheen rehta,
Tanhaai mein mujhe tanhaai ka ehsaas naheen rehta.
Aankhon mein kehkashaan si jo soorat ubhar rahi hai,
Haathon mein us ke naam ki lakeer ban rahi hai.
Wo mujhe apne rangon mein rangta jaa raha hai,
Aur mere dil ka har mausam badalta jaa raha hai.
Yehi hai agar ishq to mujhe hone laga hai ye,
Tum hi ho wo shakhs to kyun bolte naheen…
Advertisements
0 comments:
Post a Comment